Saha Ari Prabu Siliwangi?
baheula , sajarah
Ku Prof. Dr. Nina Herlina, M.S.
Sesebutan Siliwangi, geus dipikawanoh dina tradisi pustaka mandala. Di antara na, dina catetan lalakon perjalanan Bujangga Manik, nu kungsi ngaliwat ka palataran wewengkon Demak, kira-kira awal abad ka-16. Nyatet pamanggihna (baris 318-321): Latara teuing na kasép, kasép manan Banyak Catra, leuwih manan Silihwangi "Manéhna teuing ku tegep. ngaleuwihan tegepna Banyak Catra, ngaleuwihan Silihwangi".
Catetan saterusna (brs -732): Sadatang ka Tungtung Sunda, nepi ka Aregajati, sacunduk ka Jalatunda, sasakala Silihwangi "Barang datang ka tungtung tapel wates Sunda, anjog ka Aregajati, nya nepi ka Jalatunda, situs pepeling Silihwangi".
Sesebutan "Siliwangi" ogé, kacatet dina naskah Sanghyang Siksa kandang Karesian (ditulis 1518 M) "Prepantun nyaéta ahli carita pantun nu bisa nerangkeun carita pantun, saperti Langgalarang, Banyakcatra, Silihwangi, jeung Haturwangi. Sajaba ti éta, naskah lontar kropak 421 nu dingaranan gemengd "campuran" salah sahiji téksna dieusi silsilah Prabu Siliwangi, nu dibubukaan (brs 1-5) ku: Punika Prabu Siliwangi, puputra Mundingsari Ageung, puputra Mundingsari Leutik, puputra Raden Panglurah, puputra Pucuk Umun. "Nya ieu Prabu Siliwangi, apuputra Mundingsari Ageung, apuputra Mundingsari Leutik, apuputra Raden Panglurah, apuputra Pucuk Umun".
Tangtu waé, dina pustaka produk tradisi pasantrén, panerus tradisi kamandalaan, réa carita (cariosan), babad atawa wawacan-wawacan nu ngandung kisah ngeunaan Siliwangi, kaasup dina tradisi lisan mangrupa carita pantun.
Raja Sunda nu mana waé, nu dipikawanoh boga tetelahan Prabu Siliwangi?
Tetela aya sawatara pamanggih. Nurutkeun Amir Sutaarga, Prabu Siliwangi êta jujuluk atawa gelar tokoh Sri Baduga Maharaja. raja nu maréntah di Pakuan Pajajaran salila 39 tahun (1482-1521 Masehi), nu dina Carita Parahyangan katelah Ratu Jayadewata.
Kana ieu pamanggih, Ayatrohaedi ngomentar, yén nyaruakeun Prabu Siliwangi kana tokoh Prabu Jayadewata (Sri Baduga Maharaja, 1482 — 1521), sakumaha kasabit dina Carita Parahiyangan, beunang disebut wawanianan teuing.
Naha? Raja nu masih keneh marentah atawa kakarek maot sawatara taun geus disebut tokoh carita pantun (dina taun 1518 atawa samemehna), dianggap "pamali". Ceuk Ayatrohaedi, Niskala Wastu Kancana atawa Prabu Resi Bhuwana Tunggaldewata alias sang mokténg Nusalarang, éta kawasna raja nu jujuluk Prabu Siliwangi mung garan. Nurutkeun tradisi Sunda, mémang sakabéh raja Sunda sabada raja Linggabuana dikenal kalawan jujuluk Prahu Siliwangi.
Pamanggih Ayatrohaedi, dikritik ku Saléh Danasasmita. Yén ngangkat tokoh nu masih kénéh hirup dina hiji carita (pantun atawa kakawén, upamana) geus lumrah di sakuliah Nusantara. Upamana, Empu Kanwa ngangkat lalakon raja Erlangga dina Kakawen Arjuna Wiwaha; Empu Darmaja ngangkat lalakon pernikahan Raja Kameswara dina Kakawen Smardahana, Empu Sedah jeung Empu Panuluh ngangkat lalakon Raja Jayabaya dina Kakawen Bharatayuddha. Lalakon carita katut tokoh nu hirup sazaman.
Hasil ulikan Saléh Danasasmita kalawan ngabanding-banding sawatara sumber (Carita Purwaka Caruban Nagari, Naskah Pamarican, Waruga Jagat, Babad Pajajaran, Carita Parahiyangan, jeung Babad Siliwangi), nuduhkeun yén Prabu Siliwangi ngan saurang, loyog ka tokoh raja Prabu Jayadéwata atawa Sri Baduga Maharaja nu jeneng raja Karajaan Sunda Pakuan Pajajaran dina 1482 — 1521.
Saterusna, Saléh Danasasmita ngabéjérbéaskeun, ngaran resmi raja dina basa Sunda, disebut wawangi. Harti harfiyahna seuseungitan. Disebut kitu, lantaran seungit jeung mashurna raja, katangen tina ngaran resmina. Katerangan Babad Siliwangi nyebutkeun ngaran siliwangi ngandung harti asilih wewangi (ngaganti ngaran), luyu jeung katerangan nu aya dina Prasasti Batutulis, nu kieu pereleanana:
"Ini sasakala. Prebu Ratu purane pun diwastu diya wi ngaran Prebu Guru Dewataprana diwastu diya di nga ran Sri Baduga Maharaja Ratu Aji di Pakwan Pajajaran Sri Sang Ratu Dewata".
"Ieu tanda manginget, Prabu Ratu almarhum, anjeunna diistrenan make jenengan Prabu Guru Dewataprana, diistrenan deui make jenengan Baduga Maharaja Ratu Aji di Pakwan Pajajaran Sri Sang Ratu Dewata"
Jadi, tetela, Prabu Jayadewata memang ganti ngaran (asilih wewangi, silihwangi, siliwangi) basa diistrenan kadua kalina. Mimiti jenengan Prebu Guru Dewataprana, basa diistrenan jadi Raja Agung Karajaan Sunda Pakuan Pajajaran diganti deui jadi Sri Baduga Maharaja Ratu Aji di Pakwan Pajajaran Sri Sang Ratu Dewata. Dumasar kana ganti ngaran atawa ganti gelar kitu, Sri Baduga Maharaja kamashur ku jujuluk Siliwangi.
Prabu Siliwangi atawa Sri Baduga Maharaja jeneng raja taun 1482 di Pakuan Pajajaran, sanajan keur mangsa bureyna diasuh ku éyangna, Prabu Niskala Wastu Kancana di Kawali. Dumasar kana sumber-sumber historiografi tradisional (babad, wawacan) diterangkeun, garwa Prabu Siliwangi jumlahna saratus lima puluh punjul hiji. (151 urang). Ngan anu sok sering kapicatur ukur sababaraha urang. Di antarana Ambetkasìh (putri Raja Sindangkasih), Subanglarang (putri Raja Singapura, Ki Gedeng Tapa/Ki Jumanjan Jati), jeung Kentring Manik (putri Susuktunggal, Raja Pakuan, pamanna Prabu Siliwangi).
Pernikahan Prabu Siliwangi ka para garwana, lumangsung waktu Prabu Siliwangi jeneng "raja muda" di wewengkon anu dikawasana. Basa jejeng "raja muda" di Sindangkasih, Prabu Siliwangi nikah ka Ambetkasih. Ti ieu garwa, Prabu Siliwangi teu kacaturkeun kagungan putra.
Taun 422 Prabu Siliwangi nikah deui ka Subanglarang, putri Ki Gedeng Tapa alias Ki Jumanjan Jati, mangkubumi di Karajaan Singapura, ngarangkep sahbandar di Muara Jati. Nurutkeun sumber tradisi, Ki Gedeng Tapa geus ngagem agama Islam. Ari Subanglarang, santri Syekh Quro. Cenah mah, Prabu Siliwangi basa rek migarwa Subanglarang, dikudukeun asup Islam heula. Ngan sanggeus nikah, Prabu Siliwangi balik deui ngagem agama Hindu. Taya sumber sajaman nu bisa ngajelaskeun éta perkara.
Prabu Siliwangi ngalih ka Pakuan, kira-kira tahun 1427. Di Pakuan, Prabu Siliwangi diangkat jadi ratu —narima warisan tahta ti uwa-na, Susuktunggal — salila 55 tahun (1427—1482). Saterusna ti taun 1482 nepi ka 1521, Prabu Silliwangi jadi maharaja Karajaan Sunda. Mangsa Prabu Siliwangi jeneng maharaja, puseur karajaan dipindahkeun ti Kawali (Ciamis) ka Pakuan Pajajaran (Bogor). Ku kituna, ti harita, ngaran karajaan katelah Karajaan Sunda Pakuan Pajajaran.
Di Pakuan, Prabu Siliwangi kagungan deui garwa, jenengan Kentring Manik, putra Susuktunggal, uwa-na nu kungsi jadi Ratu Pakuan. Tina ieu pernikahan, Prabu Siliwangi kagungan putra, Surawisesa.
Nu matak narik perhatian, nyaeta kuburan, tempat "tilem"na, atawa lempat ngahyangna Prabu Siliwangi, dipercaya masyarakat, henteu ngan di hiji tempat. Aya nu percaya, Sang Raja "tilem" di wewengkon leuweung Sancang, pakidulan Garut. Aya nu percaya, Sang Raja ngahyang di Banten, jeung di Karawang. Aya deui nu percaya, kuburanana aya di Pajajar, Majalengka.
Dumasar pamanggih Carita Parahyangan. Prabu Siliwangi pupus taun 1521, dikurebkeun di Rancamaya, Bogor, "Sang mwakta ring Rancamaya" (nu sumare di Rancamaya).
*)Guru Besar ilmu Sejarah FIB Universitas Padjadjaran
Diterjemahkeun tina buku Sejarah Kerajaan Snda, karya Nina Herlina Lubis, dkk. Bandung: Yayasan Masyarakat Sejarawan Indonesia cabang Jawa Barat, 2014: kaca 285-289.
Dimuat di Mangle 2538
Sumber Carita Sunda
Bagikan
Saha Ari Prabu Siliwangi?
4/
5
Oleh
mygurukufile.blogspot.com
